Banka e Shqipërisë ndërhyn për euron, rritet blerja e valutës për 2023-shin

Sipas informacioneve Banka e Shqipërisë ka vendosur zyrtarisht të rrisë shumën e planifikuar të blerjeve të valutës, mes 220 dhe 300 milionë eurove për vitin 2023.

Para se të kishte luhatje në këmbimin valutor, intervali i shumës së blerjes së valutës në fillim të këtij viti ishte prej 160-220 milionë eurosh.

Guvernatori, Gent Sejko, tha të mërkurën e kësaj jave në një deklaratë për mediat se Banka e Shqipërisë ka blerë 170 milionë euro deri tani, duke kaluar kufirin e poshtëm të intervalit fillestar vjetor.

Vetë Sejko tha se do të ndërhyhet në kursin e këmbimit të monedhës vendase, nëse do të dëmtohet funksionimi normal i tregut.

Vlen të kujtojmë se ndërmarrjet eksportuese, ekspertët e ekonomisë, bizneset i kanë bërë thirrje prej disa muajsh Bankës së Shqipërisë për të ndërhyrë në kursin e këmbimit pasi sipas tyre forcimi i Lekut mund të çonte ndërmarrjet e tyre drejt falimentimit.

Në javët e fundit, kursi i këmbimit mes Euros dhe Lekut, ka pasur luhatje të shumta me rënie dhe rritje të forta.

Sipas kursit zyrtar të këmbimit të Bankës së Shqipërisë, Euro u këmbye të enjten me 104.7 lekë, në rritje me 2.75 pikë krahasuar me ditën e mërkurë.

LEXONI GJITHASHTU: 

• Ndryshon sërish kursi i këmbimit, euro ngrihet me 3 pikë brenda ditës
• Italia heq përfitimet familjare, vendimi i Melonit shkakton zemërim dhe protesta