Banorët në Porto Romano “bashkëjetojnë” me baltën dhe ujërat e zeza

Përgjatë 12 muajve të vitit, rruga “Terminali” në Porto Romano të Durrësit ka një pamje të trishtë.

Gropa dhe baltë sheh në çdo sipërfaqe të saj, ndërkohë që shkak për këtë situatë janë bërë punimet e lëna përgjysmë për hapjen e një kanali.

Ndonëse janë taksapagues të rregullt, banorët detyrohen të blejnë ujë të pijshëm e të bashkëjetojnë me ujërat e zeza.

 “Tubi i ujërave të bardha dhe ai i ujërave të zeza kalojnë këtu. Ato çahen e përzihen të gjitha këtu,” – u shpreh një qytetar.

 “Ujin e paguajmë ne, baltën s’na e heqin, vetëm na e kanë shtuar,” – tha një qytetare.

Edhe më e vështirë bëhet lëvizja në kohë shirash.

 “Ne ato urat i kemi bërë me dërrasa, që të kalojnë njerëzit për të shkuar në punë apo fëmijët në shkollë. Para 1 jave këtu as me tank nuk kalohej,” – tregoi qytetari.

 “Me çizme ecim. Një palë në dorë një palë në trastë. I lëmë sipër në rrugë e i marrim kur kthehemi,” – u shpreh qytetarja.

Prandaj ata kanë gjetur zgjidhje alternative për të lëvizur.

 “Me thënë të drejtën kemi bërë shkallë nëpër mure. Kalojmë nëpër komshinj që të çojmë fëmijët në shkollë, se këtu kur bie shi nuk kalojmë dot,” – tha qytetari.

Ndonëse këto shqetësime ia kanë bërë të ditura përmes një shkrese edhe ARRSH-së, këtyre banorëve prej muajsh askush nuk u ka dhënë ende asnjë përgjigje.

LEXONI GJITHASHTU:

• Balluku: Porti i ri në Durrës do jetë modern, nuk do i shërbejë vetëm Shqipërisë
• Durrësi pa 2 gjykata, qytetarët duhet të shkojnë në Tiranë e Lushnjë për drejtësi