Bardhi: Do të propozojmë rezolutë për hetim ndërkombëtar për vrasjen e policit

Kreu i Grupit Parlamentar të Partisë Demokratike, Gazment Bardhi, ka deklaruar se do t’i propozojë Kuvendit të Shqipërisë, rezolutën në mbështetje të Kosovës që dënon vrasjen e efektivit të policisë nga terroristët serbë dhe nisjen e një hetimi ndërkombëtar në lidhje me rastin.

Përmes një postimi në rrjetin social “X”, Bardhi nënvizon se do të propozojë gjithahstu në Kryesinë e Kuvendit që në seancën e radhës të parlamentit të Shqipërisë të mbahet një mocion me debat në lidhje me Kosovën.

Ai shtoi se është domosdoshmëri që Kuvendi i Shqipërisë të harmonizojë plotësisht qëndrimin e tij me Kuvendin e Kosovës.

“Fjalët që ndryshojnë sipas orëve të Edi Ramës në raport me zhvillimet në Kosovë nuk kanë asnjë vlerë. Është koha që Republika e Shqipërisë të veprojë në mbështetje të Kosovës.

Rezoluta e miratuar sot nga Kuvendi i Kosovës duhet të miratohet pa asnjë vonesë edhe nga Kuvendi i Shqipërisë. Si kryetar i Grupit Parlamentar të PD do të propozoj një mocion me debat mbi këtë çështje dhe në përfundim të të cilit, do të propozojmë miratimin e Rezolutës.

Kuvendi i Shqipërisë duhet të harmonizojë plotësisht qëndrimin e tij me Kuvendin e Kosovës, duke kërkuar nga qeveria shqiptare, që në bashkëpunim me institucionet e Kosovës dhe aleatët ndërkombëtarë, të kërkojë dhe nxisë një hetim ndërkombëtar ndaj Republikës së Serbisë”, shkruan Bardhi në reagimin e tij.

LEXONI GJITHASHTU:

• Kosova nxjerr rezolutë për hetimin ndërkombëtar të sulmeve në Banjskë
• Basha pret reporterët e KiE: Qytetarët të zgjedhin deputetin dhe presidentin
• Kryesia e Partisë Demokratike përjashton 11 deputetë (Emrat)