Barrierat “izolojnë” banorët, bllokohet rruga për 100 familje në Fllakë të Durrësit

Vendosja e barrierave në rrugën e Fllakës ka penalizuar mbi 100 familje të zonës, të cilët ankohen se nuk kanë nga të dalin në autostradë, e aq më pak të kryejnë punët e tyre të përditshme.

“S’kemi as nga të hyjmë, as nga të dalim, vetëm nga ajri. Se si i bëjnë këto punë nuk e dijmë. Firma s’di gjë, do të marrë ato lekët e veta, shteti s’na ndihmon”, tha një prej të pyeturve.

Ky është shqetësimi i rreth 100 familjeve në Fllakë të Durrësit. Vendosja e kufizuesve të rrugës nga ana e Autoritetit Rrugor Shqiptar u ka mbyllur atyre të gjitha lidhjet me autostradën Tiranë – Durrës.

“Këtë rrugë kishim, edhe këtë rrugë na e bllokuan. Kemi 30 vjet këtu, nga të fluturojmë? Nga njëra anë kemi kanalin, andej është autostrada, këtu duan ta bllokojnë, ne nga të shkojmë?”, tha një tjetër i pyetur.

“Sot kemi hallin, se jemi duke u izoluar. As nuk ka si të shkojë fëmija në shkollë, as nuk kemi si të shkojmë te spitali, as për Tiranë, as për Durrës”, tha një prej të pyeturve.

“Me shku në spital, me pas një njeri të sëmurë nga do dalim ne? Vetëm të porosisim helikopterin, që të na nxjerrin nga shtëpitë në rrugë”, tha një djalë i ri.

Jo vetëm qytetarët, bllokimi i rrugës prek dhe dhjetra bizneset e zonës, taksapagues të rregullt.

“Kemi biznese. Tani shikojeni, ka ku të kthehet kamioni këtu? 20 m kamion me 2 metra rrugë? Po na bllokojnë biznesin”, tha një tjetër i pyetur.

Për ta si përdorues rruge është shqetësuese mungesa e konsultimeve publike mes tyre dhe autoriteteve.

“Mos të kujtojnë se janë trima dhe cuba. Të vijë shteti të vejë dorë këtu, t’i shikojë. I kemi dërguar letrat në bashki. Tokë kemi boll, se shqiptarët kanë ik, tani këto pak që kemi mbetur të punojmë me njëri-tjetrin”, tha një burrë.

Barrierat mbrojtëse u vendosën nga ARRSH në rrugën Fllakë-Xhafzotaj pa ndërtuar një rrugë të re, në vijim të punimeve për rehabilitimin e autostradës Tiranë-Durrës.

LEXONI GJITHASHTU:

• Aksident i rëndë në Durrës, makina përplas për vdekje një person me biçikletë
• Policia arreston 11 persona për përplasjen me armë në Elbasan