Barrot: Do t’i bëjmë thirrje BE-së t’i përgjigjet tarifave të fundit të Trump 

Franca do t’i bëjë thirrje Bashkimit Evropian që t’i përgjigjet tarifave të fundit të shpallura nga presidenti i SHBA-së, Donald Trump, tha sot ministri i Jashtëm francez Jean-Noel Barrot.

Ai i tha televizionit TF1 se Franca dhe partnerët e saj evropianë nuk duhet të hezitojnë të mbrojnë interesat e tyre përballë kërcënimeve nga tarifat amerikane. Trump tha mbrëmë se ai planifikon të shpallë tarifa prej 25 për qind për të gjitha importet e çelikut dhe aluminit në SHBA sot.

Ai deklaroi se këto taksa do të zbatohen për “çdo çelik dhe alumin që hyn në SHBA” dhe shtoi se do të shpallë “tarifa reciproke” për disa vende “të martën ose të mërkurën” që do të hyjnë në fuqi “pothuajse menjëherë” pas njoftimit, por nuk specifikoi se cilat vende do të synohen.

Gjatë mandatit të tij të parë, Trump vendosi tarifa prej 25 për qind për importet e çelikut dhe 10 për qind për importet e aluminit nga Kanadaja, Meksika dhe BE-ja, por një vit më vonë u arrit një marrëveshje me Kanadanë dhe Meksikën për eliminimin e këtyre tarifave, ndërsa taksat mbi importet e BE-së mbetën në fuqi deri në vitin 2021.