Basha bisedë me Johannes Hahn: Integrimi në BE do ta ndryshojë përgjithmonë jetën e shqiptarëve

Kryetari i Partisë Demokratike Lulzim Basha zhvilloi sot një bisedë online me Komisionerin e BE-së për Buxhetin dhe administratën, Johannes Hahn, i cili me herët ka qenë përgjegjës për procesin e zgjerimit.

Hahn ka vleresuar rolin e opozitës në miratimin e reformës në drejtësi ndërsa theksoi se sundimi i ligjit është çështja më e rëndësishme për një vend që synon anëtarësimin në Bashkimin Evropian.

“Jam i sigurt që një vend si Shqipëria ka bërë shumë përpjekje [për integrimin] dhe mbaj mend mirë se kjo është bërë e mundur vetëm falë angazhimit tuaj,” – tha Hahn duke kujtuar këtu miratimin e reformës në drejtësi në mënyrë unanime bashkë me mazhorancën.

“Në rast se një qeveri e re do të jetë më shumë e angazhuar, ky do të ketë një impakt të konsiderueshëm,” – tha Hahn,” – “mund t’ju mbështes në të gjitha përpjekjet tuaja.”

Basha shprehu mirënjohje për angazhimet e BE-së ndaj Shqipërisë në përballjen e dëmeve që shkaktoi tërmeti i vitit 2019. Ai tha se synimi kryesor për Tiranën mbetet mobilizimi për tejkalimin e problemeve që shkaktoi ai, por që kryesore mbetet edhe lufta kundër korrupsionit.