Basha: Kjo është një fitore e qartë për shqiptarët, një fitore e qartë për Aleancën për Ndryshim

Ndërsa procesi i votimeve ka përfunduar, kryetari i Partisë Demokratike, Lulzim Basha, bëri një deklaratë nga selia e PD-së ku u shpreh se rezultati i sotëm do të jetë një fitore e qartë për popullin shqiptar dhe Aleancën për ndryshim.

“Faleminderit të gjithë qytetarëve shqiptarë që zgjodhën ndryshimin. Kjo është një fitore e qartë për popullin shqiptar, është një fitore e qartë për Aleancën për Ndryshim. Vullneti i popullit është në kutitë e votimit dhe unë kam besim të plotë se numëruesit dhe komisionarët do ta përmbyllin këtë proces me përgjegjësi, me durim dhe sipas ligjit”, u shpreh z. Basha.

Lulzim Basha tha në fund të fjalës së tij se Shqipëria fiton.

“Siç kam thënë në fillim të fushatës, në fund të këtij procesi: Shqipëria fiton”, mbylli fjalën e tij z. Basha.

Ndërkohë, përpara selisë së PD-së janë grumbulluar një pjesë e madhe simpatizantësh, duke krijuar një atmosferë të gjallë. Të grumbulluarit janë kryesisht të rinj nga forumi rinor i PD-së. Simpatizantët kanë filluar të thërrasin “fitore” përpara se të dalë rezultati final.