Basha komenton postimin e Vuçiçit për Kosovën: Shfaqje nacionaliste që dëmton vetëm Serbinë

“Shfaqje nacionaliste që dëmtojnë vetëm Serbinë,” – kështu e ka cilësuar kryetari i Partisë Demokratike Lulzim Basha postimin e në rrjetet sociale të presidentit të Serbisë Aleksandar Vuçiç, i cili kishte shfaqur të enjten një hartë të Kosovës me flamur serb.

“Deklaratat dhe veprimet e Presidentit të Serbisë Aleksandër Vuçiç nuk i shërbejnë bashkëpunimit, paqes dhe stabilitetit në rajon, ato nxisin konflikt dhe përçarje. Kosova e pavarur është realitet i pakthyeshëm,” – u shpreh Basha në Twitter.

“Sa më shpejt të pranohet realiteti i Kosovës së lirë dhe të pavarur, aq më mirë do të jetë për Serbinë, popullin e saj dhe gjithë Ballkanin për të ecur më shpejt drejt BE-së si interesi më i mirë i popujve tanë,” – vijoi më tej kreu i PD-së.