Basha lider më i pëlqyer në kryeqytet, Godole: Rama lideri i konsumuar, prisja që në Tiranë të ishte më keq

Sondazhi zgjedhor Barometri Politik i Euroneës Albania dhe MBR zbuloi se Edi Rama shihet të ketë pëlqyeshmëri më të lartë si lider në rang kombëtar në krahasim me qarkun e Tiranës, ndërsa Basha është më i preferuar në Tiranë sesa në nivel kombëtar.

Për Jonila Godole, drejtore e Institutit për Demokraci, Media dhe Kulturë, e gjithë fushata agresive që sipas saj do të vijë dhe do të bëhet më shumë agresive nga ana e kryeministrit Edi Rama dhe PS për momentin ka më shumë gjasa të sjellë ulje të mëtejshme të pëlqimit për Ramën.

Sipas znj. Godole, nisur nga fakti që Edi Rama është një lider i konsumuar 8 vite në pushtet, pritej që vlerësimi për të ishte edhe më negativ se kaq.

“Kjo do të varet si do të zhvillohet fushata. S’po flas për fushatë negative, pasi fushata negative është më se normale, madje është edhe e nevojshme ndonjëherë. Negative do të ishte nëse bëhej propagandë. Duhet të jetë një palë tjetër që të bëjë përballjen. E kam fjalën për fyerje, bullizëm dhe nëse do kemi shenja dhune. Na intereson si do të zhvillohet gjithë procesi zgjedhor dhe çfarë do të ndodhë me të pavendosurit”, tha znj. Godole.