Basha mungon në seancën e votimit të ministrave, vizitë në Francë

Me zgjedhjen e strukturave drejtuese qendrore të partisë, Lulzim Basha vijon konsolidimin e pozitave të tij në Partinë Demokratike të ri-formatuar, pa pjesën e rithemelimit të Berishës dhe pa mbështetësit e Gazment Bardhit.

Në seancën plenare të kësaj të hëne Basha mungoi për shkak të agjendës ndërkombëtare. Mësohet se Basha do të marrë pjesë në mbledhjen e Këshillit të Europës.

Pas rikthimit nga vizita dy ditore në Francë, mësohet se kryedemokrati do t’i përkushtohet punëve të partisë.

Ditën e mërkurë janë dy takime të rëndësishme të planifikuara. Fillimisht një takim me strukturat e degëve, në atë që quhet Kolegji i Kryetarëve dhe më pas kryesinë e re të partisë që doli nga mbledhja e Këshillit Kombëtar të shtunën.

Me përmbylljen e këtyre takimeve, e vetmja fazë e riorganizimit që nuk është përmbyllur është ajo e zgjedhjeve në degë. Sipas planit të miratuar nga kryesia pas rikthimit të Bashës, me përmbylljen e riorganizimit të strukturave në qendër, procesi do të shtrihet në degë.

Gjithë ky aksion i Bashës do të kulmojë më 31 mars 2023, kur ai ka paralajmëruar se do të publikohen emrat e 140 kandidatëve për deputetë që do të garojnë me siglën e Partisë Demokratike për zgjedhjet e ardhshme të përgjithshme.

LEXONI GJITHASHTU:

• Nikollë Lesi: Basha e ka marrë përfundimisht PD-në, zgjidhja e vetme që ka opozita
• Ristrukturimi i PD-së, gazetari: Ja pse Basha nuk po zgjedh “besnikët e kryetarit”