Basha në Kongresin Amerikan: Prioritet korrupsioni, pastrimi i politikës, zgjedhjet

Kryetari i Partisë Demokratike, Lulzim Basha, u takua me Kongresmenin Brian Babin, përfaqësues i Teksasit.

Në këtë takim, Basha vlerësoi ndihmën e vazhdueshme që SHBA-ja ka dhënë dhe po jep, për luftën kundër korrupsionit, forcimin e sistemit të drejtësisë dhe shtetit të së drejtës.

Kreu i Partisë Demokratike, e njohu kongresmenin me prioritet e PD-së, që nga lufta kundër korrupsionit, pastrimi i politikës nga politikanët e korruptuar dhe të inkriminuar, zgjedhjet e lira e të ndershme, zhvillimi ekonomik dhe krijimi i mundësive për shqiptarët  që të mos largohen nga vendi.

Basha, theksoi se korrupsioni është pengesa më e madhe, për zhvillimin e vendit dhe krijimin e mundësive për të rinjtë, që ata të ndërtojnë jetën e tyre në Shqipëri.

Duke u ndalur në situatën delikate të sigurisë, zoti Basha shprehu shqetësimin për përpjekjet e Rusisë për të krijuar një vatër të re tensioni në Ballkan, dhe se ajo çfarë ndodhi më 24 shtator në Kosovë ishte shenjë e kësaj përpjekje, por falë profesionalizmit të policisë së Kosovës dhe mbështetjes së KFOR-it, fatmirësisht dështoi.

Rusia kërkon një front të ri për të tërhequr vëmendjen nga Ukraina, theksoi Basha, ndërsa shtoi se, Rusia duhet të paguajë për dëmet e shkaktuara në Ukrainë. Në këtë kuadër, Zoti Basha e njohu atë, me rezolutën për rindërtimin e Ukrainës të përgatitur prej tij, që gëzon një mbështetje të gjerë në Këshillin e Europës, për të cilën është dhe reporter.

LEXONI GJITHASHTU:

• Basha takim me studentë: Integrimi në BE, interesi më i lartë kombëtar për PD
• Basha në Washingon, vijon takimet me senatorë e kongresmenë në forumin e IDU