Basha: Në kuvendin e ri, PD rezolutë për gjenocidin serb në Kosovë

Në parlamentin e ri që fillon punën më 9 shtator, Partia Demokratike ka paralajmëruar se do të paraqesë një rezolutë për të dënuar gjenocidin serb në Kosovë.

Lajmin është bërë me dije nga kryedemokrati Lulzim Basha, i cili përmes një statusi në twitter, teksa kujton masakrën e Srebrenicës, të cilën e quan gjenocid, thotë se “Shqipëria duhet të ketë kurajon dhe pavarësinë për ta dënuar atë dhe gjenocidin serb në Kosovë”.

Për masakrën e Srebrenicës ka reaguar edhe presidentja Vjosa Osmani dhe kryeministri Albin Kurti.

Këta të fundit janë shprehur se akte të tilla duhet të marrin gjykimin e drejtësisë.

Më 11 korrik të vitit 1995, mbi 8,000 burra dhe djem boshnjakë u vranë , pasi forcat serbe të Bosnjës pushtuan Srebrenicën.

Masakra e Srebrenicës është episodi i vetëm i luftës në Bosnjë që përcaktohet si një gjenocid, përfshirë nga dy gjykata të Kombeve të Bashkuara.