Basha vizitë në Panairin e Librit: PD, program për të mbështetur letërsinë dhe artin

Kryetari i Partisë Demokratike, Lulzim Basha, i shoqëruar nga Flutura Açka dhe Preç Zogaj, vizitoi këtë të enjte Panairin e Librit. Ndërsa  u ndal një e nga një në stendat e librit, zoti Basha vlerësoi interesin e madh që po shfaqin të rinjtë për librin.

“Më bëhet zemra mal kur shikoj lexues të rinj e të reja. Për këtë dua t’i shpreh një falënderim në veçanti prindërve dhe arsimtarëve, të cilët përmes pranisë së nxënëve në panairin e librit, po bëjnë një investim shumë të rëndësishëm për gdhendjen dhe sofistikimin e shijes së lexuesve shqiptarë”,-tha Basha.

Kreu i PD e konsideroi shumë të rëndësishëm investimin për letërsinë, kulturën dhe artin.

“E rëndësishme është vëmendja ndaj autorëve shqiptarë, sepse nëse ka një tipar dallues që po bashkon shqiptarët në Shqipëri, Kosovë, Maqedoni të veriut, në Malin e Zi, në Greqi e diasporë, është gjuha shqipe, ruajtja dhe promovimi i së cilës është një nga misionet më të shenjta”,-tha kryetari i PD.

“Në programin e PD, që po përgatitet në bashkpunim me ekspert kombëtarë dhe ndërkombëtarë, një vemendje e veçantë i kushtohet letërsisë, artit dhe kulturës”, – theksoj zoti Basha duke sjellë në vëmendje, që mbështetja për librin në Shqipëri nuk është as gjysma e mbështetjes që jep Kosova.

LEXONI GJITHASHTU:

• Basha në Panairin e Librit: Më bëhet zemra mal kur shoh të rinj që lexojnë
• Nis panairi i 26 i librit në Tiranë! Libra të rinj, autorë e përkthyes të pranishëm