BE-Britani, thirrje për zgjidhje diplomatike, çfarë qëndrimi po mban SHBA-ja

Ministrat e Jashtëm të 27 vendeve anëtare të Bashkimit Evropian mbërritën të hënën në Bruksel për të diskutuar mbi situatën në Lindjen e Mesme, edhe pse të vetëdijshëm se janë injoruar tërësisht nga administrata Trump.

Të premten, ministrat e Jashtëm të Francës dhe Gjermanisë, si dhe homologu i tyre britanik David Lammy, udhëtuan për në Gjenevë në përpjekje për të ulur tensionet dhe për të rikthyer Teheranin në tryezën e bisedimeve.

Pas takimit me shefin e diplomacisë iraniane, Abbas Araghchi, zyrtarët evropianë dolën me mesazhin e përbashkët se bisedimet duhet të vazhdonin dhe se vlerësonin përpjekjet amerikane për të gjetur një zgjidhje të negociuar.

Por negociata nuk pati dhe më pak se 24 orë më vonë, Shtetet e Bashkuara kryen sulmet e tyre ndaj Republikës Islamike.

Duke reaguar, Irlanda deklaroi se sulmet përbënin një “përshkallëzim jashtëzakonisht të rrezikshëm”. Ndërsa ministri i Jashtëm spanjoll, Jose Manuel Albares tha se Evropa duhet të bëhet “zëri i paqes dhe diplomacisë”.

Në të njëjtën linjë, kryeministri britanik Keir Starmer tha se Mbretëria e Bashkuar është tërësisht e fokusuar tek çtensionimi i situatës në Lindjen e Mesme.

“Kjo, sepse druhemi për një përshkallëzim rajonal dhe më të gjerë, por edhe për impaktin në ekonominë tonë”, sqaroi Starmer.

Por për momentin, Evropa vazhdon të orvatet të gjejë zërin e saj të unifikuar, një zë të cilin duket se nuk e dëgjon askush.