BE e cilëson të motivuar politikisht lëvizjen e Rusisë për reduktimin e gazit

Njoftimi i fundit i Gazprom për të reduktuar më tej furnizimin përmes gazsjellësit Nord Stream 1 është një “hap i motivuar politikisht”, tha të martën Komisionerja Evropiane për Energjinë Kadri Simson, përpara një takimi me ministrat e energjisë të BE-së në Bruksel.

“Nuk ka asnjë arsye teknike për ta bërë këtë. Ky është një hap i motivuar politikisht dhe ne duhet të jemi gati për këtë”, tha Simson.

Të hënën, kompania shtetërore ruse e energjisë tha se do të reduktojë më tej rrjedhat e gazit përmes gazsjellësit Nord Stream 1 nga e mërkura, pasi ndalon një tjetër turbinë për riparime. Tubacioni është një arterie jetike që lidh rezervat e mëdha të gazit të Rusisë me Evropën nëpërmjet Gjermanisë.

Kapaciteti ditor nga ora 7:00 e mëngjesit (me orën e Moskës) 27 korrik do të jetë deri në 33 milionë metra kub”, tha kompania në një deklaratë. Nord Stream 1 ka një kapacitet prej rreth 160 milionë metra kub në ditë.

Simson tha se njoftimi i Gazprom “nënvizoi edhe një herë se ne duhet të jemi gati për shkurtimet e mundshme të furnizimit nga Rusia në çdo moment”.

LEXONI GJITHASHTU:

• Marrëveshja me Rusinë, Ukraina gati anijet me grurë në portin e Odesës
• Rusia redukton më tej furnizimin me gaz për Europën