BE jep 50 milionë euro ndihmë humanitare për Ukrainën

Bashkimi Evropian ka njoftuar se ka dhënë një fond shtesë prej 50 milionë eurosh, ndihma humanitare për të mbështetur civilët e prekur nga pushtimi rus në Ukrainë.

Ky financim i ri do të ndihmojë në plotësimin e nevojave në shërbimeve mjekësore emergjente, strehim dhe mbrojtje, akses në ujë të pijshëm dhe higjien, ndihmë me para cash si dhe mbështetje kundër dhunës me bazë gjinore.

Komisioneri i BE-së për menaxhimin e krizave, Janez Lenarcic, tha se me 50 milionë euro shtesë do të ndihmojnë njerëzit në zonat e vështira të luftës.

“Do të ndihmojë njerëzit në zonat e vështira për t’u arritur, të cilëve u është ndërprerë aksesi në kujdesin shëndetësor, ujë dhe energji elektrike, dhe ata që janë detyruar të ikin dhe të lënë gjithçka pas. Ukrainë, ne jemi me ju”, tha Lenarcic.

Nga 50 milionë euro ndihmë nga BE, 45 do të shkojnë për projekte në Ukrainë kurse 5 për Moldavinë.

Kjo ndihmë e çon fondin humanitar në përgjigje të luftës në 143 milionë euro. Fondi është pjesë e paketës prej 1 miliard euro që Komisioni Evropian zotoi si ndihmë për Ukrainë një javë më parë.