BE shpall sanksionet ndaj Rusisë, në shënjestër kriptovalutat, bankat dhe energjia

Bashkimi Evropian pritet të shpallë sot paketën e 19-të të sanksioneve ndaj Rusisë, e cila sipas presidentes së Komisionit Evropian, Ursula von der Leyen, do të synojë sektorët e kriptovalutave, bankat dhe energjinë.

Sipas raportimeve të Bloomberg, që i referohen The Guardian, BE-ja po shqyrton gjithashtu vendosjen e masave ndëshkuese ndaj kompanive në Kinë dhe Indi, të cilat akuzohen se po ndihmojnë Moskën të vazhdojë tregtinë e naftës.

Ky zhvillim vjen në një kohë kur presioni mbi Brukselin po rritet nga presidenti amerikan, Donald Trump, i cili ka kërkuar që blloku të përshpejtojë hapat drejt shkëputjes së plotë nga nafta ruse.

Duke folur dje në Londër, krah kryeministrit britanik, Keir Starmer, Trump theksoi se SHBA është e gatshme të ndihmojë Evropën në përballjen me Rusinë, por jo nëse vendet evropiane vijojnë të blejnë naftë nga Moska.

“Nuk mund ta bëni këtë. Kjo nuk është lojë e ndershme me Shtetet e Bashkuara, dhe ne nuk mund ta pranojmë”, u shpreh presidenti amerikan.

LEXONI GJITHASHTU:

• Kremlini do të ngadalësojë ekonominë ruse dhe kjo mund të shkaktojë probleme
• Rumania dënon shkeljen e hapësirës ajrore të saj nga një dron rus