Begaj-“Kushtetueses”: Përcaktoni skemën si do bëhet ripërtëritja e trupës gjyqësore

Presidenti Bajram Begaj ka kërkuar që Gjykata Kushtetuese të përcaktojë skemën e ripërtëritjes së anëtarëve të saj, duke përfshirë edhe dy mandate të tjera që kanë mbetur të papërcaktuara.

Kjo kërkesë është bërë pas shpalljes së mbarimit të mandatit për gjyqtaren Holta Zaçaj, por pa trajtuar ende të njëjtën çështje për dy anëtarët e tjerë që përfshihen në përtëritjen e parë pas ndryshimeve të vitit 2016.

Begaj ka theksuar se nëse nuk deklarohet mbarimi i këtyre mandateve, nuk mund të ketë një ripërtëritje të plotë të Gjykatës Kushtetuese në vitin 2025, duke vënë në dyshim ligjshmërinë e shkurtimit të mandatit të Zaçaj.

Begaj i kujton “Kushtetueses” se në 2025-n duhet të ishin 3 gjyqtarët që do të ndërroheshin, përfshirë edhe mandatin e Sonila Bejtjës, si emërtesë e Presidentit duke kërkuar që procesi i deklarimit të mandateve të mbaruara të përfundojë para datës 25 janar 2025, sipas ligjit për organizimin e Gjykatës Kushtetuese.

“Nëse është e vërtetë se, “në ekuilibrin midis parimit të qëndrueshmërisë në detyrë dhe atij të përtëritjes së Gjykatës”, ky i fundit prevalon, atëherë Gjykata Kushtetuese duhet të kishte përfunduar procedurën për deklarimin e mandatit të gjyqtares Bejtja dhe të kishte njoftuar Presidentin e Republikës për vakancën përpara datës 25.1.2025 (pika 3 e nenit 9 të ligjit nr. 8577, datë 10.2.2000, “Për organizimin dhe funksionimin e Gjykatës Kushtetuese të Republikës së Shqipërisë”, të ndryshuar”). Kjo gjë jo vetëm nuk ka ndodhur, por edhe nuk ka asnjë njoftim publik nga ana e Gjykatës Kushtetuese në këtë Drejtim”, thotë Begaj.

LEXONI GJITHASHTU:

• Mandati i Holta Zaçaj, Kushtetuesja nuk del me vendim, seanca shtyhet sërish
• Merr fund diskutimi për mandatin e Holta Zaçaj, trupa gjykuese shpall vendimin