“Ne himariotët jemi kokëfortë”- Beleri: S’do ja dilni me mua, ju hajdutët e pronave

Kryebashkiaku i zgjedhur i Himarës, Fredi Beleri, është shprehur se shkeljet e ligjit dhe vjedhja e votave për të cilat ai akuzohet dhe po mbahet në burg, janë thjeshtë imagjinare.

Komentet Beleri i bëri përmes një lidhjeje me emisionin “Now me Erla Mëhillin” në Euronews Albania, ku tha se Bashkia e Himarës po mbahet peng nga koalicioni i hajdutëve të pronave.

Por ai premtoi se ata nuk do ia dalin ta “rrëmbejnë” Bashkinë e Himarës, pasi sipas tij, himariotët janë kokfortë dhe të vendosur në të drejtën e tyre.

“Këtu barazia ligjore nuk funksionon. I gjithë opinioni publik shqiptar po manipulohet sikur Greqia po i bie në qafë gjithë popullit shqiptar për të mbrojtur një njeri që sipas tyre ka vjedhur vota.

Shteti grek ka dosjet dhe nuk do i futeshe në një debat kaq të madh nëse do të besonte se në këtë çështje kam faj apo kam bërë shkelje të ligjit. Shkeljet e ligjit janë imagjinare, janë me regji, por unë besoj se e vërteta do të dalë. Pse duhet të mbahet Bashkia nga njerëz që po e mbajnë sot? Është diçka që të gjithë duhet ta mendojnë.

Koalicioni i hajdutëve të pronave, nga njëra anë janë hajdutët e pronave, ndërtimet pa leje dhe abuzuesit me tenderat dhe nga ana tjetër populli i Himarës. I garantoj këtu se nuk do ja dalin, sepse himariotët janë kokfortë, kanë histori dhe nuk tërhiqen”, tha Beleri.

LEXONI GJITHASHTU:

• GJKKO merr vendimin për Fredi Belerin
• Betimi/Beleri flet nga burgu: Si e dha Rama 4 muaj më parë vendimin e sotëm të GJKKO