“Bella Ciao” në plumba, vrasësi i Kirk dyshohet i indoktrinuar me ideologji të majtë

Guvernatori i Utahut, Spencer Cox, tha sot se Tyler Robinson, i dyshuari për vrasjen e patriotit amerikan Charlie Kirk, ishte “thellësisht i indoktrinuar me ideologji të krahut të majtë” dhe ishte regjistruar si votues i pavarur, raporton Hill.

“Është shumë e qartë për ne dhe për hetuesit se ky ishte një person thellësisht i indoktrinuar me ideologji të krahut të majtë”, tha Cox për Wall Street Journal.

Cox tha më parë se një anëtar i familjes Robinson u tha hetuesve se i dyshuari, 22 vjeç, ishte “bërë më i prirur politikisht vitet e fundit”.

Një anëtar i familjes, sipas guvernatorit të Utah-ut, tha se Robinson përmendi në një darkë të kohëve të fundit se Kirk ishte planifikuar të fliste në Universitetin e Luginës së Utah-ut, ku ndodhi vrasja.

“Ata folën për arsyet pse nuk e pëlqenin dhe për qëndrimet që kishte. Një anëtar i familjes deklaroi gjithashtu se Kirk ishte plot urrejtje dhe se po përhapte urrejtje”, tha Cox.

Guvernatori i Utah-ut tha se gëzhojat e plumbave që dyshohet se janë përdorur nga Robison kishin të shkruara fjalët e këngës italiane partizane “Bella Ciao”, si dhe “Hej Fashist” dhe “Nëse po e lexon këtë, je gej, LMA”.

Cox tha se një anëtar i familjes së Robinson kontaktoi një mik të familjes të enjten në mbrëmje, i cili më pas kontaktoi Zyrën e Sherifit të Qarkut të Uashingtonit, duke thënë se i dyshuari kishte “pranuar ose sugjeruar se e kishte kryer” krimin.

Robinson është student i vitit të tretë në programin e inxhinierisë elektrike në Kolegjin Teknik Dixie , sipas Bordit të Arsimit të Lartë të Utahut, dhe u arrestua nën dyshimin për vrasje të rëndë dhe dy krime të tjera shtetërore.

Charlie Kirk u vra më 10 shtator gjatë një debati publik të quajtur “Ma provo që jam gabim” në Universitetin Utah Valley.

LEXONI GJITHASHTU:

• Analiza/ A do të ndikojë vdekja e Kirk në ligjet për armët në Amerikë?
• Pasuria e konsiderueshme e Charlie Kirk vlerësohet mbi 80 milionë dollarë