Bënte thirrje  për djegien e kutive të votimit, arrestohet i riu në Libofshë

Në afërsi të qendrës së votimit në fshatin Agim në Fier, një qytetar ka bërë thirrje për djegien e kutive të votimit.

Qytetari me iniciale M.P, banues në fshatin Havaleas, ka shkuar në kishën e fshatit Agim dhe ka hedhur në oborrin e jashtëm të saj një shishe me molotov e cila ka shpërthyer dhe për pasojë ka pasur vetëm dëme të vogla materiale.

Ai ka kërcënuar gjithashtu se do të djegë të gjitha kutite e votimit, duke sharë të gjitha subjektet politike.

Policia ka mbërritur në vendngjarje ku ka shoqëruar autorin drejt Komisariatit ndërkohë që në cilësinë e provës material janë sekuestruar, shishe molotov, armë të ftohta dhe libra të një sekti fetar.

“Po kryhen veprimet procedurale hetimore për zbardhjen e plotë të rrethanave të ngjarjes,” – thuhet në njoftimin e Policisë.