Bëri drift me makinë dhe e postoi në Tik Tok, ‘e pëson’ 21-vjeçari në Elbasan

Një 21-vjeçar në Elbasan është gjobitur me 40 mijë lekë të reja dhe është proceduar penalisht, pasi ka bërë drift me automjetin e tij në një qendër të banuar dhe e ka publikuar videon në Tik Tok.

Sipas Policisë, të riut i është sekuestruar edhe automjeti në cilësinë e provës materiale.

Njoftimi i Policisë:

Elbasan-Bëri drift me automjet, në qendër të banuar, ndëshkohet me masë administrative 40 000 lekë dhe procedohet penalisht për prishje të qetësisë publike, 21-vjeçari.

Automjeti u sekuestrua në cilësinë e provës materiale.

Në lidhje me një video të publikuar në portalin “Tik-Tok”, në të cilën shfaqet një automjet duke kryer manovër të rrezikshme (drift), në bulevardin “Aqif Pasha”, sqarojmë se shërbimet e Komisariatit të Policisë Elbasan kanë kryer veprimet për identifikimin e drejtuesit të automjetit.

Drejtuesi i automjetit, shtetasi M. C., 21 vjeç, banues në Elbasan, është shoqëruar në Komisariat, bashkë me automjetin e tij.

Në vijim të veprimeve, specialistët për Hetimin e Krimeve të Komisariatit të Policisë Elbasan referuan materialet në Prokurori ku nisi procedimi në gjendje të lirë ndaj shtetasit M. C., 21 vjeç, banues në Elbasan, për veprën penale “Prishja e qetësisë publike”.

Gjithashtu, nga specialistët e Policisë Rrugore iu vendos masa administrative 40 000 lekë, bazuar në nenin 139 të Kodit Rrugor.

Automjeti u sekuestrua në cilësinë e provës materiale.

Drejtoria Vendore e Policisë Elbasan fton qytetarët të denoncojnë në numrin 112 dhe në Komisariatin Dixhital, çdo rast të shkeljes së rregullave të qarkullimit rrugor, dhe i garanton ata se do të reagojë menjëherë dhe konform ligjit.

LEXONI GJITHASHTU:

• Ministri Balla bën analizën vjetore: Ndryshime rrënjësore në Policinë e Shtetit
• Balla: Mjetet luksoze të konfiskuara bandave kriminale do t’i kalojnë policisë