Berisha homazhe për Arben Tafajn: Qytetar shembullor i Tiranës

Kryetari i Partisë Demokratike, Sali Berisha, ka marrë pjesë këtë të mërkurë në homazhet e mbajtura për ndarjen nga jeta të aktivistit dhe politikanit Arben Tafaj.

Në fjalën e tij Berisha vlerësoi figurën e Tafaj, duke e cilësuar si një qytetar shembullor të Tiranës.

Kreu i PD shprehu ngushëllime për miqtë dhe të afërmit e 63-vjeçarit.

“Erdha të shpreh mirënjohjen më të thellë për Arben Tafajn, një qytetar shembullor i Tiranës, një prind, bashkëshort shembullor. Një qeveritar vendor i ndershëm, i aftë, kompetent. Një parlamentar i kryeqytetit, i aftë, i ndershëm dhe një përfaqësues dinjitoz i qytetarisë së Tiranës. Një njeri që i kushtoi jetën e vet, veprimtarinë e tij, mbrojtjes së vlerave të kësaj qytetarie dhe ishte pa diskutim një nga përfaqësuesit më dinjitoz të saj.

Shpreh ngushëllime për të gjithë qytetarët e Tiranës që kanë humbur një përfaqësues të shquar, për të gjithë miqtë, të afërmit e tij”, përfundoi Berisha.

Arben Tafaj humbi jetën në moshën 63-vjeçare pasi u rrëzua aksidentalisht nga lartësia e banesës në kryeqytet.

LEXONI GJITHASHTU:

• Ndahet nga jeta politikani dhe aktivisti Arben Tafaj
• Kuvendi mban 1 minutë heshtje për Arben Tafajn