Berisha homazhe për Mirush Kabashin: U largua si “Sokrati” i kësaj kohe

Ish-kryeministri Sali Berisha bëri homazhe këtë të mërkurë në nder të figurës së ndritur të aktorit të madh të skenës dhe ekranit, Mirush Kabashi, i cili mbylli sytë të martën në moshën 75-vjeçare.

Berisha u shpreh gjatë një prononcimi për mediat se, Mirush Kabashi ishte mbret në skenë, u largua si “Sokrati” i kësaj kohe.

Ai ishte mbret në skenë, ndoshta askush tjetër nuk arriti të sublimohet në interpretimet e tij në personazhet që mori përsipër, tha kryedemokrati Berisha.

“Erdha për të shprehur së bashku me mikun tim, Besnik Mustafaj, mirënjohjen tonë, admirimin e pakufishëm për gjeniun e skenës, filmit dhe teatrit, Mirush Kabashin.

Por, për Mirushin ka gjithnjë celebrim të asaj trashëgimie që ky le për ne dhe brezat që vijnë.

Ai vërtet ndahet, por ndahet duke lënë një trashëgimi mahnitëse.

Ai ishte mbret në skenë, ndoshta askush tjetër nuk arriti të sublimohet në interpretimet e tij në personazhet që mori përsipër.

Ai, e them, u largua si Sokrati i kësaj kohe, në sensin që me Apologjinë e Sokratit, shënoi ndoshta kulmin e tij në skenën shqiptare, por edhe atë ndërkombëtare.

Ndaj edhe njëherë ngushëllime më të ndjera familjes, respektin dhe nderimin më të madh për veprën e pavdekshme të Mirush Kabashi”, tha Berisha.