Berisha: Mbështes kërkesat e qytetarëve në protestën e sotme

Kryetari i Partisë Demokratike, Sali Berisha deklaroi se mbështet kërkesat e qytetarëve në protestën e sotme, që do të zhvillohet për vdekjen e 7-vjeçares në plazhin e Potamit në Himarë.

Përmes një postimi në rrjetet sociale, Berisha shprehet se kryeministri Edi Rama po shfaqet arrogant, duke mbrojtur veten, ministrin e Brendshëm, Bledi Çuçi dhe ministren e Turizmit, Mirela Kumbaro teksa qytetarët kërkojnë dorëheqjen e tyre.

“Drejtesi per Jonaden. Edi Rama arrogant mbron veten, Çuçin e familjes dhe Kumbaron, refuzon kerkesat e qytetarëve. Sot qytetarët në protestë të fuqishme në orën 19:30 për largimin e Çuçit, Kumbaros dhe Nanos. Mbështetje të plotë protestës dhe kërkesave të qytetarëve. sb”, shkruan Berisha në rrjetin social, Facebook.

Intinerari pritet të jetë i njëjtë si protesta e së enjtes, ku fillimisht protestuesit do të mblidhen në orën 19:30 para godinës së Ministrisë së Brendshme, për të marshuar më pas drejt Kryeministrisë.

Më 2 gusht, shtetasi Arjan Tase përplasi për vdekje 7-vjeçaren, teksa kryente manovra të rrezikshme me skaf në plazhin e Potamit në Himarë.

Ai ishte efektiv policie dhe u përjashtua nga rradhët e policisë nga Drejtori i Përgjithshëm, Gledis Nano.

Në lidhje me këtë ngjarje të rëndë, Gjykata e Vlorës ka dhënë masën e sigurisë arrest me burg për ish-efektivin Arjan Tase.

LEXONI GJITHASHTU

• Sot protesta e dytë për 7-vjeçaren, kërkohet dorëheqja e Çuçit dhe Kumbaros
• Skafi erdhi me shpejtësi skëterre, dëshmia e babait të 7-vjeçares për tragjedinë
• Përfundon protesta për 7-vjeçaren, të hënën qytetarët sërish para Kryeministrisë