Berisha në Asamblenë e PPE-së: Duhet mision faktmbledhës ndërkombëtar për zgjedhjet

Kryetari i Partisë Demokratike, Sali Berisha, ka marrë pjesë këtë të martë në Asamblenë Parlamentare të Partive Popullore Europiane, ku ka ngritur shqetësime të forta për situatën politike dhe institucionale në Shqipëri, veçanërisht në lidhje me zgjedhjet e 11 majit.

Në fjalën e tij, Berisha akuzoi qeverinë për manipulim masiv të zgjedhjeve, duke theksuar se “vota ishte e vdekur para se të hynte në kuti”.

Sipas tij, i gjithë aparati shtetëror u kthye në një trupë elektorale në shërbim të partisë në pushtet, ndërsa qeveria përdori burime financiare dhe njerëzore pa kufi për të ndikuar rezultatin.

Kryedemokrati ngriti edhe alarmin për atë që e quajti “narko-shteti shqiptar”, duke akuzuar kryeministrin për dhënie masive licencash për kultivimin e kanabisit dhe lidhje me kartele ndërkombëtare droge.

“Shqipëria është i vetmi narko-shtet në Europë. Kartelat e drogës kanë kapur portet, kanë partneritete me polici, prokurori, ministra dhe vetë kryeministrin,” deklaroi Berisha.

Ai i kërkoi Partisë Popullore Europiane të dërgojë një mision faktmbledhës në Shqipëri, për të hetuar situatën dhe për të mbledhur prova mbi manipulimin zgjedhor dhe lidhjet e pushtetit me krimin e organizuar.

“Një mision i tillë do të ishte me rëndësi të jashtëzakonshme, jo vetëm për Shqipërinë, por edhe për vendet tuaja, sepse Shqipëria eksporton jo vetëm krim dhe drogë, por edhe emigracion masiv,” theksoi Berisha.

Në përmbyllje, ai falënderoi PPE-në për mbështetjen dhe për rezolutën e miratuar më herët, duke kërkuar që ajo të pasohet me veprime konkrete ndërkombëtare.

LEXONI GJITHASHTU:

• Berisha thirrje Trump: Shpalli grupe terroriste organizatat kriminale shqiptare
• Berisha denoncoi trenin bullgar në Pekisht, Celibashi: Rasti duhet hetuar patjetër
• Berisha: Materiale zgjedhore dhe para u gjetën në një kafe në Pekisht, u blenë vota