Berisha ‘non grata’, Pampuri: S’donim të përfshiheshin strukturat, Basha mori një barrë

Orjola Pampuri, zëdhënëse e grupit parlamentar të Partisë Demokratike thotë se vendimi i SHBA për shpalljen ‘non grata’ të Sali Berishës i ka gjetur në befasi pasi vinte pas ‘masakrës zgjedhore’.

Znj. Pampuri thotë se deputetët e PD nuk donin që të përfshiheshin në këtë çështje duke shtuar se janë ndjerë mirë që “barrën” e mori kryetari i partisë.

“Që të jem e sinqertë, unë dhe shumë kolegë të mitë janë ndjerë mirë që atë vendim e mori vetë z. Basha.  Nuk doja që të përfshiheshim dhe ajo që bëri Basha ishte një barrë e madhe mbi supe”, tha deputetja e PD.

Orjola Pampuri u shpreh se fillimisht qëndrimi i Berishës për t’u distancuar nga PD deri në zgjidhjen e çështjes përmes gjykatës ishte veprim i lavdërueshëm.

Znj. Pampuri tha se gjithçka ndryshoi pas vendimit të 9 shtatorit kur Basha pezulloi nga grupi parlamentar Berishën.

Sipas saj, ndryshimi në statut për të përjashtuar nga çdo funksion në parti të personave që shpallen ‘non grata’ mbron PD në të ardhmen nga krijimi i amullive pasi mund të ketë persona të tjerë që do të shpallen të tillë.