Berisha për vrasjen në Shëngjin: Mbrojtësit e qeverisë kryen ekzekutimin e radhës

Ish-kryeministri Sali Berisha ka reaguar me një postim në rrjetin e tij Facebook lidhur me ngjarjen e sotme në Shëngjin, ku u ekzekutua në lokalin e tij biznesmeni Ardian Nikulaj.

Berisha është shprehur se viktima ka marrë kërcënime në lidhje me fushatën elektorale, pasi siç thotë ai Nikulaj ishte kundër kandidaturës së kandidatit të Partisë Socialiste, Pjerin Ndreu.

“Skuadra e pushkatimit nën mbrojtjen e qeverisë kryen ekzekutimin e radhës! Rendi në duart e krimit!

Të dashur miq, sot ditën për drekë u ekzekutua në lokalin e tij biznesmeni dhe eksponenti i PSD-së, ish-kandidat për deputet në zgjedhjet e 2021 dhe kandidat për këshilltar në këto zgjedhje i kësaj partie Ardian Nikulaj.

Ky krim i shëmtuar ndodh tre ditë pasi Edi Rama hapi fushatën në Lezhë dhe pasi viktima, i ndjeri Nikulaj, kishte bërë të qartë publikisht se ai ishte kundër kandidaturës së Rilindjes, Pjerin Ndreu, duke dalë kështu haptazi kundër aleancës Rama-Doshi dhe linjës zyrtare të partisë së tij. Ndërkohë mësohet se ditët e fundit ai ka marrë kërcënime të përsëritura nga mjedisi banditesk i kriminelëve elektoral Manja-Ndreu, drejtues (kapobanda) kryesore të Rilindjes për Qarkun e Lezhës.

Duke i shprehur ngushëllimet familjes së të ndjerit, PD dënon me ashpërsinë më të madhe ekzekutimin e politikanit lokal dhe biznesmenit Ardian Nikulaj si një akt të shëmtuar kriminal në fushatë elektorale dhe me sfond politik nga falangat e krimit të lidhura direkt me qeverinë”,-shkruan Sali Berisha në postimin e tij.

LEXONI GJITHASHTU:

• Vrasja në Shëngjin, ish-drejtori i policisë: Autori duket se ka përvojë në atentate
• Ekzekutimi i biznesmenit në Shëngjin, reagon kryebashkiaku Pjerin Ndreu