Berisha: Përshëndes Steinmeier, mirënjohje për kujdesin që tregoi ndaj Nishanit

Kreu i PD-së Sali Berisha ka përshëndetur presidentin gjerman Frank-Walter Steinmeier, i cilie erdhi sot në Tiranë dhe do të qëndrojë për dy ditë.

Në një deklaratë për mediat pas seancës plenare, ai tha se Steinmeier vjen këtu si mik dhe kryetar i një shteti që ka ndihmuar Shqipërinë nga viti 90 deri më sot me mbi 1 miliardë e 300 milionë euro.

Më tej, Berisha shprehu mirënjohjen për presidentin gjerman për kujdesin që tregoi për presidentin Bujar Nishani në momentet më kritike të jetës së tij.

“Një vend që ka mbështetur Shqipërinë në të gjithë përpjekjet e saj për të vendosur demokracinë dhe ekonominë e tregut. Si ministër i Jashtëm, ai ka mbështetur çlirimin e Kosovës së bashku me qeverinë e vendit të tij. Interesi i tij për Shqipërinë dhe shqiptarët ka qenë gjithmonë prezent. Kam mirënjohje për kujdesin e tij njerëzor tejet të çmuar që tregoi për presidentin Bujar Nishani në momentet më kritike të jetës së tij.

Me këtë rast, i shpreh mirënjohjen më të thellë për aktin dhe gjestin e tij shumë njerëzor në mbështetje të përpjekjeve të presidentit Nishani me sëmundjen e tij”- tha ai.

LEXONI GJITHASHTU: 

• ‘Liderët evropianë s’janë si Rama’, Berisha për protestën: Bulevardin s’e lëshojmë
• Presidenti gjerman: Shqipëria, model për Europën dhe vendin tim