Berisha: Rama publikon Censin pasi i ka manipuluar të dhënat nga e para tek e fundit

Ish-kryeministri Sali Berisha është shprehur se ditën e nesërme kreu i qeverisë, Edi Rama, do të publikojë të dhënat e Censit të Popullsisë dhe Banesave, pasi i ka manipuluar të dhënat.

Komentet Berisha i bëri gjatë fjalës para mbështetësve nga dritarja e banesës së tij, ku po vuan dënimin me ‘arrest shtëpie’ për ‘korrupsion’.

Berisha tha gjithashtu se Kosova i ka publikuar të dhënat e Censit brenda ditës së fundit që është regjistruar edhe qytetari i fundit.

Reagimi i Berishës:

Të dashur qëndrestare dhe qëndrestarë, misionarë të vërtetë të kauzës së madhe të lirisë, dinjitetit të çdo shqiptari, të atdhetarisë dhe interesit kombëtar.

Të dashur qytetarë dhe qytetare, nesër Edi Rama, Çubrilloviçi i shqiptarëve publikon të dhënat e regjistrimit të popullatës pasi ka manipuluar ato nga e para tek e fundit.

Pasi ka shtuar qindra e mijëra qytetarë që nuk janë më në Shqipëri këtë vit, as prej vitesh.

Se cili është rezultati i këtij akti, unë dua t’u informoj ju vetëm kaq se i realizuar me të njëjtën metodikë si kjo e Shqipërisë, Republika e Kosovës i ka publikuar ato brenda ditës që është regjistruar dhe qytetari i fundit në atë vend.

Sepse regjistrimi online e bënte të mundur plotësisht këtë.

Në vitin 2011, regjistrimi u bë me formularë të mbushur nga punonjësit duke takuar çdo qytetar.

Megjithatë, publikimi i tij nuk mori kurrë më shumë se tre-katër javë.

Në Serbi, regjistrimi i popullatës u publikua pas tre javësh.

Në Shqipërinë e narkoshtetit të Edvin Drogës, ky regjistrim publikohet pas nëntë muajve.

Me këtë histori mashtrimi kërkon Çubrilloviçi të maskojë krimin e tij më të shëmtuar ndaj shqiptarëve, krijimin e kushteve për largimin e tyre masiv nga Shqipëria.

LEXONI GJITHASHTU:

• “Opozita në mobilizim të paparë”, Berisha: Rama duhet të largohet
• Berisha zbulon 2 taksat që do të hiqen të parat nëse PD vjen në pushtet