Berisha reagon për humbjen në zgjedhje: Shqiptarët votuan nën presion

Ish-kryeministri Sali berisha ka reaguar në lidhje me rezultatin e zgjedhjeve lokale, ku koalicioni “Bashkë Fitojmë” mundi të merrte vetëm 7 bashki.

Berisha në fjalën e tij theksoi se raporti i OSBE-ODHIR evidetoi problematikat që sipas tij tjetërsuan rezultatin.

Berisha tha se blerja e votës, presionet e administratës dhe makinerisë elektorale, bënë që qytetarët të mos votonin të lirë.

“Me këtë rast unë vlerësoj raportin e OSBE-ODHIR, të autoriteteve lokale dhe rajonale, të cilët dëshmuan se zgjedhësit shqiptarë votuan nën presion dhe jo të lirë. Kjo është kryefjala e këtyre zgjedhjeve, ku me presione të të gjitha llojeve Edi Rama ndryshoi në mënyrë antikushtetuese e antiligjore vullnetin e shqiptarëve, ndryshoi rezultatin e vendimit. Raporti paraprak ndonëse është paraprak vë gishtin nga problemet më madhore të këtyre zgjedhjeve duke filluar nga makineria shtetërore elektorale si një përbindësh shkatërrimtar i procesit zgjedhor. Si një akt që krijon pabarazi. Ndalet në të gjitha format antiligjore të ndërhyrjes. Nënvizon blerjen masive të votës, deri dhe presionet e tjera të administratës mafioze, më e pranishme se kurrë në qendrat e votimit dhe procesin e votimit. Përpjekjet për të shkëputur ndonjë gjysmë fraze nga përfaqësuesit e nderuar nga vëzhguesit më prestigjoz në Evropë, OSBE-ODHIR, dështuan”, tha Berisha.

LEXO GJITHASHTU:

• Humbja në Shkodër dhe a do të ketë dorëheqje, Berisha flet për herë të parë
• Fitoi vetëm 7 bashki, Berisha: S’kishim fonde, u demonstrua aleanca e krimit