Berisha shantazoi politikanë me dosje për të bërë koalicion, thotë Kreshnik Spahiu

Juristi Kreshnik Spahiu deklaroi se kryetari i Partisë Demokratike, Sali Berisha nuk i ka hapur në mënyrë të qëllimshme dosjet në vitin 1992.

Në një intervistë për Euronews Albania, Spahiu u shpreh se ish-kryeministri ka shantazhuar politikanë të cilët kishin dosje, në mënyrë që të bashkëpunonin me të dhe të bënin koalicion.

Sipas tij, përveç ish-presidentit Meta, do të ketë edhe figura të tjera të larta politike, që do të penalizohen nga ligji për hapjen e dosjeve.

“Unë kam një qasje ndryshe nga të tjerët dhe këtë nuk e kam thjesht bindje, por e kam informacion. Një nga arsyet themelore që qeverisja Berisha dhe Partia Demokratike nuk i hapën dosjet në vitin 1992 dhe i mbajtën për 30 vite të mbyllura, ishin sepse disa liderë politikë i mbajti peng me dosjet e tyre.

Duke pasur dosjet e shumë eksponentëve politikë, Berisha dhe Partia Demokratike i mbanin peng dhe i shantazhonin këta persona, që të bashkëpunonin në momente të caktuara dhe të ishin pjesë e koalicionit të tyre. Jam i sigurt që përveç Ilir Metës, në të ardhmen do të ketë shumë figura të larta politike, të cilat do të jenë pjesë e pengesës ligjore, për të marrë poste politike”, theksoi ai.

94 deputetë votuan dje pro ligjit për hapjen e dosjeve.

Nga 140 deputetë në sallë, vetëm 95 morën pjesë në votim, ku një abstenoi. 45 të tjerë refuzuan të votonin.

LEXONI GJITHASHTU

• Spahiu: Ligji për hapjen e dosjeve, plan i Shteteve të Bashkuara të Amerikës
• Bamir Topi: Njoh njerëz që kanë qenë bashkëpunëtorë të Sigurimit, por nuk flas dot
• Ligji për hapjen e dosjeve/ Alibeaj: Duhej bërë më herët, por më mirë vonë se kurrë