Beteja për Lysychansk, rusët dhe ukrainasit pretendojnë kontrollin e qytetit

Flamujt çeçenë dhe rusë po valëviten në qytetin e fundit të madh të mbetur në rajonin e Luhansk.

Sipas kreut të Çeçenisë, pretendohet  se Lysychansk tani është nën kontrollin e forcave ruse. Një nga komandantët çeçenë Ramzan Kadyrov u shpreh se qyteti ukrainas ishte pushtuar.

“Po, qyteti është nën kontroll të plotë, po bëhet një operacion pastrimi”, konfirmoi ai.

Megjithatë, ushtria ukrainase i ka hedhur poshtë këto pretendime dhe thotë se luftimet e ashpra janë ende duke vijuar në të gjitha frontet.

Një zëdhënës i Gardës Kombëtare të Ukrainës thotë se qyteti nuk ka qenë i rrethuar dhe mbetet nën kontrollin e ushtrisë ukrainase.

Ndërkohë, forcat e armatosura të Ukrainës publikuan pamjet duke thënë se ishte një shpërthim në magazinat e ushtrisë ruse në Ukrainën Lindore. Megjithatë vendndodhja dhe data e saktë nuk janë specifikuar.

Por më shumë raketa ruse janë lëshuar në veri dhe jug. Ministria ruse e Mbrojtjes pretendon se ka shkatërruar me armë të precizionit të lartë pesë poste komanduese ukrainase në rajonin e Donbasit dhe në rajonin e Mykolaiv. Tri depo municionesh në rajonin Zaporizhzhia dhe një bazë e armëve ukrainase në Kharkiv u goditën gjithashtu nga ushtria ruse.

Këto shpërthime vijnë një ditë pasi një bllok apartamentesh u godit në Odesa duke vrarë të paktën 21 persona dhe duke plagosur dhjetëra, një akt që presidenti ukrainas Volodymyr Zelenskky e ka quajtur ‘të qëllimshëm’, pretendim që Kremlini e mohon.

LEXONI GJITHASHTU:

• Siria njeh si vende të pavarura rajonet pro-ruse, Luhansk dhe Donetsk
• Rusia vijon me bombardimet në Ukrainë, nevojë për ndihma humanitare