Bibika Kokalari: Nuk e çoj arkivën e Musinesë në shtëpinë e Enver Hoxhës

Këtë të shtunë “Real People” solli një personazh e cila na ktheu pas në kohë dhe na zbuloi më tepër detaje nga Musine Kokalari, disidentja e parë shqiptare e cila nuk pati drojë të kundërshtonte një nga regjimet më të egra totalitare në botë, regjimin e diktatorit Hoxha.

Bibika Kokalari, bashkëshortja e kushëririt të Musinesë ka treguar se si e ka njohur shkrimtaren dhe se si asaj iu besua arkiva e saj. Bibika rrëfen se e takoi për herë të parë Musinenë në Onkologjik në kohën kur Musineja ishte e sëmurë e nga ai çast arritën të mbanin kontakte, ndërsa Musineja herë pas herë u kërkonte të shkonin ta takonin e të merrnin sendet e saj.

“E gjeta një herë në një shtëpi që çfarë binte jashtë e fuste brenda. Më pas e ndryshuan. Ajo kërkonte të shkonim të merrnim gjërat e saj. Na tha të shkonim të përgatitur me litar që ti lidhnim gjërat e të shkonim me makinë që ti merrnim, pasi ajo nuk ishte më në gjendje ti ruante. Në fillim korriku shkuam dhe i morëm gjërat që kishte përgatitur. Kur i morëm, ajo u ul dhe psherëtiu fort, unë thash se mbaroi. Çfarë ke hallë Musine?- i thash. Tani u qetësova- më tha,-që i lash në duar të sigurta”,-tha Bibika Kokalari.

Ajo zbuloi për “Real People” disa nga sendet personale të shkrimtares, diplomën e saj origjinale dhe valixhen në të cilën ajo kishte ruajtur dorëshkrimet e saj. Bibika tha se amaneti i Musine Kokalarit ishte që arkiva e saj t’i dorëzohej muzeut Etnografik të Gjirokastrës, por ajo refuzon ti çoj atje pasi ky muze ëhstë bërë në shtëpinë e Enver Hoxhës.

“Unë në muzeun etnografik nuk i çoj, sepse muzeu etnografik në Gjirokastër është në shtëpinë e Enver Hoxhës. unë në shtëpinë e Enver Hoxhës që ishte xhelat i saj, nuk mundem ti çoj. Nuk i çoj dot. Tani është hapur një memorial për Musine Kokalarin, e ka bërë një e fisit tonë. Është e largët pak nga ne, por prapë është e jona dhe më mirë i çoj atje, i kam më të sigurta, i kam në ruajtje dhe atje. Se nëse bëhet muzeu për Musinenë ato do të shkojnë atje”,-tha Bibika.

LEXONI GJITHASHTU:

• “E takova Musinen në Onkologjik”, Bibika Kokalari rrëfen momentin e veçantë…
• Promovohet libri në kuadër të 40-vjetorit të ndarjes nga jeta të Musine Kokalari