“E takova Musinen në Onkologjik”, Bibika Kokalari rrëfen momentin e veçantë…

Këtë të shtunë “Real People” solli një personazh e cila na ktheu pas në kohë dhe na zbuloi më tepër detaje nga jeta e një prej grave më të zëshme në letërsinë dhe politikën shqiptare, Musine Kokalarit.

Bibika Kokalari, bashkëshortja e kushëririt të Musinesë ka treguar vështirësitë me të cilat është përballur ajo vetë gjatë sistemit komunist në Shqipëri, por edhe njohjen e saj me Musinenë. Sipas saj sajo ishte një vajzë shumë e përgatitur dhe bindjet e saj politike i kishte bërë të ditura. Bibika tha se takimin e parë me Musine Kokalarin e ka patur në dyert e Onkologjikut, në kohën kur shkrimtarja ishte e sëmurë.

“Shkova në Tiranë te daja e Platonit. Në mëngjes bëra kontrolle, e në drek thash që do shkoja te mama Fejzia e cila ishte gruaja e vëllait të pushkatuar të Musinesë. Musineja kishte dy vëllezër të pushkatuar. Ndejta 5 orë atje, ndërsa në darkë do shkoja te vëllai i Musinesë, duke shkuar për atje takova afër onkologjikut takova mamanë e Ridvan Peshkëpisë, ajo më pyeti nëse po shkoja te Musineja. Ç’ Musine i thash unë? Pse se dini ju? ajo është e sëmurë, është shtruar në spital më tha. Unë ika drejt e në spital. Musinenë nuk e njihja, kisha parë vetëm një foto, por nuk e kisha takuar kurrë. Kur zbriti nga shkallët e kam njohur vetëm nga hapat. Ishin tamam hapa zonje. I kishte flokët e prera ishte me rrobat e spitalit. Kur e kam takuar unë ishte 60 e ca vjeçe, nuk më dukej e njëjta Musine. U takuam aty, ndejtëm pak aty. Ajo përkëdheli vajzën time, i mbante mend ditëlindjen. I dinte ditëlindjet e të gjithëve”,-tha Bibika.

Më pas Bibika tregoi se e ka vizituar rrallë herë në Rrëshen.

“E gjeta një herë në një shtëpi që çfarë binte jashtë e fuste brenda. Më pas e ndryshuan. Ajo kërkonte të shkonim të merrnim gjërat e saj”,-tha Bibika Kokalari.

LEXONI GJITHASHTU:

• Bibika Kokalari: Nuk e çoj arkivën e Musinesë në shtëpinë e Enver Hoxhës
• Hapet ekspozita “Përherësi” e piktorit Naxhi Bakalli , i pranishëm Rama