Presidenti i Shteteve të Bashkuara të Amerikës, Joe Biden, ka mbushur 81 vjeç këtë të hënë.
Sipas mediave të huaja, ky është një moment historik që ka të ngjarë të tërheqë vëmendjen për statusin e tij si personi më i vjetër që ka zënë ndonjëherë Zyrën Ovale, me sondazhet e opinionit publik që tregojnë se amerikanët janë të shqetësuar se ai është shumë i vjetër për këtë post.
Por ai po kërkon rizgjedhjen në postin e presidentit të SHBA-ve, për një mandat të dytë.
Biden u është drejtuar atyre që shqetësohen se është shumë i vjetër për ashpërsinë e Shtëpisë së Bardhë me humor dhe një përpjekje për të bindur votuesit se mosha dhe përvoja e tij mbi një gjysmë shekulli në jetën publike është një aset në trajtimin e problemeve të Amerikës.
“E di që jam 198 vjeç”, tha Biden me shaka në qershor.
Nëse do të rizgjidhej, Biden do të ishte 86 vjeç deri në fund të mandatit të tij të dytë në detyrë. Republikani Ronald Reagan, i cili kishte rekordin e mëparshëm si presidenti më i vjetër i SHBA-së, përfundoi mandatin e tij të dytë katërvjeçar në moshën 77-vjeçare në vitin 1989.
Trump, kandidati kryesor nga republikanët për të sfiduar Biden në zgjedhjet e 2024, është 77 vjeç.
Në një sondazh të mesit të shtatorit të Reuters/Ipsos, votuesit shprehën shqetësim për moshën e Biden dhe aftësinë e tij për postin. Shtatëdhjetë e shtatë për qind e të anketuarve, përfshirë 65 për qind të demokratëve, thanë se Biden është shumë i vjetër për të qenë president, ndërsa vetëm 39 për qind thanë se Biden ishte mjaft i mprehtë mendërisht për presidencën.
Për krahasim, 56% e të anketuarve në sondazh thanë se Trump është shumë i vjetër për postin, ndërsa 54% thanë se ai ishte mjaft i mprehtë mendërisht për të përballuar sfidat e presidencës.
LEXONI GJITHASHTU:
- Biden paralajmëron Izraelin: Pushtimi i Gazës do të ishte “gabim i madh”
- Biden dhe Xi dakordësohen të ndalojnë fentanilin dhe rifillojnë dialogun ushtarak