Biden si Trump, presidenti amerikan do vijojë ndërtimin e murit me Meksikën

Administrata e presidentit Joe Biden do të ndërtojë një pjesë të murit kufitar në jug të Teksasit, në përpjekje për të ndaluar fluksin e lartë të emigracionit.

Rreth 32 kilometra mur do të ngrihen në kontenë Starr, përgjatë kufirit me Meksikën, ku zyrtarët raportojnë një rritje të ndjeshme të kalimeve të paligjshme.

Ngritja e një muri kufitar ishte një politikë e Donald Trump kur ishte president dhe që u kundërshtua ashpër nga demokratët.

Në 2020-n, Biden premtoi se nuk do të ndërtonte pjesë të tjera të murit nëse do të zgjidhej. Por numri në rritje i kalimeve ilegale të kufirit e ka kthyer çështjen në një pikë të cenueshme për presidentin.

Sipas të dhënave qeveritare, më shumë se 245 mijë kalime janë regjistruar këtë vit, me shtatorin që pritet të rezultojë muaji rekord.

Banorë të qyteteve të ndryshme deklarojnë se po ndjejnë ndikimin e fluksit.

Kryetari i Bashkisë së Nju Jorkut, Eric Adams parashikoi se kostoja e strehimit të mbi 100 mijë emigrantëve të ardhur që prej vitit të kaluar do të rritet në 12 miliardë dollarë në tre vitet e ardhshme.

Zoti Adams zhvillon këtë javë udhëtime në Meksikë, Kolumbi dhe Ekuador, në përpjekje për të dekurajuar emigrantët. “Kemi tejkaluar të gjitha kapacitetet”, deklaroi ai ditën e martë.

Ndërsa sekretari i presidentit Biden për sigurinë e brendshme foli për një “nevojë imediate dhe akute” për të ndërtuar murin dhe për të parandaluar hyrjet e paligjshme në territorin e Shteteve të Bashkuara.

LEXONI GJITHASHTU:

• Kafshoi agjentin e shërbimit sekret, qeni i Biden hiqet nga Shtëpia e Bardhë
• Presidenti Biden do të kërkojë vazhdimësinë e financimit për Ukrainën