Presidenti amerikan Joe Biden druhet se në Shtetet e Bashkuara nuk do të ketë një tranzicion të qetë pushteti nëse Donald Trump humb zgjedhjet e nëntorit.
Në intervistën e parë që nga tërheqja nga gara presidenciale muajin e kaluar, Biden tha për “CBS News” se, “nëse Trump humbet, nuk kam aspak besim”.
“Trump e ka seriozisht atë që thotë, jemi ne që nuk e marrim seriozisht. Ai e ka seriozisht kur thotë se, nëse humbet do të ketë gjakderdhje”, deklaroi Biden.
Komentet e Trump, se në vend do të verifikohej një gjakderdhje masive nëse humbet zgjedhjet, të bëra gjatë një takimi për industrinë e automjeteve, shkaktuan një valë kritikash.
Demokratët menjëherë përsëritën mesazhin e tyre se ish-presidenti përbën një kërcënim për demokracinë. Stafi i Biden e përdori termin “gjakderdhje” në një reklamë të postuar në rrjetet sociale dhe një zëdhënës akuzoi Trump se po inkurajonte dhe justifikonte dhunën politike.
Nga ana tjetër, stafi elektoral i ish-presidentit tha se fjalët e tij ishin nxjerrë qëllimisht jashtë kontekstit. Përmes një mesazhi elektronik, stafi deklaroi gjithashtu se, kundërshtarët politikë të Trump në mënyrë “mizore” kishin keqinterpretuar fjalët e tij.
Në intervistën për “CBS News”, Biden shprehu gjithashtu shqetësime se mund të ketë përpjekje për të komplikuar procesin e certifikimit post-elektoral.
“Shihni pak se çfarë po përpiqen të bëjnë tani, në zgjedhjet lokale ku njerëzit numërojnë votat. Nuk mund ta duash vendin tënd vetëm atëherë kur fiton”, nënvizoi Biden.
LEXONI GJITHASHTU:
- Biden kritikon “ekstremizmin” në Gjykatën Supreme, bën thirrje për mandate me limite
- Ish-krahu i djathtë i Trump vlerëson Biden: Vendosi interesat e kombit përpara
