Bie numri i nxënësve, 4,2% më pak regjistrime në gjimnaz

Numri i regjistrimeve të nxënësve nëpër shkolla ka rënë krahasuar me një vit më parë, sipas INSTAT.

Emisioni Mirëmëngjes raporton se gjatë periudhës 2021-2022 janë regjistruar 2% më pak nxënës dhe studentë, me një total prej 577.869 personash.

Arsimi parashkollor ka pasur 1,5% regjistrime më pak se një vit më parë, me një total prej 72.384 nxënësish.

Regjistrimet në arsimin 9-vjeçar janë tkurrur me 2,9%, ku janë regjistruar 278.138 nxënës.

Ndërsa në arsimin e mesëm regjistrimet kanë rënë me 4,2%, dhe janë regjistruar 103.467 nxënës.

Arsimi 9-vjeçar ka aktualisht 24.400 mësues, ndërsa ai i mesëm ka 8.658 mësues.

Në fillore, për një mësues në arsimin publik janë 16,1 nxënës, ndërsa në privat, 14,6. Në arsim 9-vjeçar, për një mësues në arsimin publik janë 8,5 nxënës, në privat është një mësues për 7,3 nxënës. Në arsimin e mesëm, për një mësues në arsimin publik janë 12,8 nxënës, në privat janë 8,3 nxënës.