Prodhimi i energjisë është ulur në tremujorin e tretë. Nga korriku deri në shtator, nga hidrocentralet dhe panelet u prodhua 1.565 Gigavat, me rënie 3% në raport me vitin e kaluar.

Për këtë arsye edhe sasia e blerë për të mbuluar nevojat në vend ka qenë më i lartë.

Konkretisht, sistemi importoi 762 GWh nga 755 GWh që realizoi në të njëjtën periudhë të një viti më pare dhe shiti  jashtë vendit 282 gigavat, ose 38% më pak se vjet. Pra, me bilancin negativ të shkëmbimit 480 GWh dhe me çmimet mesatare të periudhës, vendi ynë ka humbur rreth 67 mln euro.

Ky tremujor që përkon me stinën e verës, dhe nevojat për konsum rriten nga qytetarët e bizneset. Të dhënat tregojnë se konsumi i përgjithshëm u rrit me 7%.

Shqipëria nuk arrin të mbulojë nevojat e veta me energji, pasi prodhimi është i varur nga kushtet klimatike. Për të krijuar pavarësi energjetike, vendi ynë po investon tek energjia diellore dhe ajo erës, e kjo duket edhe nga rritja progresive e prodhimit që sjellin këto parqe.