Bisedimet me Iranin, Trump: Nuk duam të shohim asnjë bombë bërthamore

Presidenti amerikan, Donald Trump ka bërë me dije se ka 15 pika të rëndësishme për të arritur një marrëveshje me Iranin. Kjo deklaratë vjen pas bisedimeve me Iranin që vazhduan deri vonë në mbrëmje të dielën me dy të dërguarit më të lartë të SHBA-së.

“Do të shohim se ku do të na çojnë”, u tha Trump gazetarëve në aeroportin e West Palm Beach.

“Do të thoja se nëse ata vazhdojnë me këtë, kjo do t’i japë fund atij problemi, atij konflikti, dhe mendoj se do ta përfundojë atë në mënyrë shumë, shumë thelbësore”, shtoi ai.

Trump tha se të dërguarit e tij Steve Witkoff dhe Jared Kushner ishin të përfshirë në diskutime, por ai nuk ishte i qartë në lidhje se me kë po bisedonte SHBA-ja në Iran. Ai specifikoi se ishte një udhëheqës “i respektuar” që nuk është Udhëheqësi Suprem Mojtaba Khamenei.

“Ata duan shumë të bëjnë një marrëveshje. Edhe ne do të donim të bënim një marrëveshje”, tha Trump, duke thënë se do të kishte telefonata shtesë të hënën, të ndjekura nga një takim ballë për ballë.

“Po bëjmë një periudhë pesëditore, do të shohim se si do të shkojë. Nëse shkon mirë, do ta zgjidhim këtë çështje. Përndryshe, thjesht do të vazhdojmë të bombardojmë”, tha Trump.

Ai tha se çdo marrëveshje do të kërkonte që Irani të mos pajiset me bombë bërthamore.

“Ne nuk duam të shohim asnjë bombë bërthamore, asnjë armë bërthamore”, tha ai por edhe që SHBA-të të marrin në zotërim uraniumin shumë të pasuruar të Iranit.

“Pluhuri bërthamor. Ne do ta duam atë. Dhe mendoj se do ta arrijmë. Ne kemi rënë dakord për këtë”, tha ai.