BKT Smart Invest, miratohet nga AMF aplikacioni për investime ndërkombëtare

Aplikacioni ‘Smart Invest’ është tashmë në duart e klientëve të Bankës Kombëtare Tregtare nëpërmjet Degës Internet dhe BKT Smart. Kjo platformë, e miratuar nga Autoriteti i Mbikëqyrjes Financiare, u lejon klientëve të investojnë në një gamë të gjerë produktesh financiare nga e gjithë bota. Drejtori i Përgjithshëm dhe anëtar i Bordit të BKT, z. Seyhan Pencablıgil, e konsideron revolucion në Tregun e Financave Shqiptare.

“Ky është një revolucion për qytetarët shqiptarë, sepse ashtu si udhëtimi pa viza në Shengen, tashmë edhe investimi nuk ka më kufij. Deri më tani, alternativat e investimeve ishin mjaft të kufizuara për Shqipërinë; depozitat me afat ose obligacionet qeveritare. Tashmë ka mijëra alternativa të sigurta të investimeve pa kufij”, thotë z. Seyhan Pencablıgil.

Drejtori Ekzekutiv i AMF, Ervin Mete vlerësoi platformën, duke deklaruar se AMF është angazhuar në përafrimin e kuadrit ligjor e rregullator me legjislacionin e BE-së.

“Ligjet e reja kanë rritur standardet dhe kërkesat për transparencë dhe përshtatshmëri, si elementë thelbësorë të nxitjes së besimit dhe pjesëmarrjes së investitorëve në tregjet e kapitalit. Kjo është platforma e parë e shërbimeve të investimeve online, që i jep akses të drejtpërdrejtë investitorëve shqiptarë”, shprehet z. Mete.

BKT Smart Invest lejon klientët e bankës që të kryejnë veprime në rreth 25 mijë instrumente financiare dhe të investojnë në aksionet e kompanive më të mëdha ndërkombëtare nga telefoni ose kompjuteri.