Blendi Çeka: LSI dhe partitë e vogla tregojnë domosdoshmërinë e pushtetit për të mbijetuar

Kur janë numëruar rreth treçereku i kutive të votimit , LSI-ja ka marrë 6.84% të votave që të përkthyera në mandate janë 6 të tillë.

Rezultate këto më të ulëta në krahasim me vitet e kaluara, por sipas specialistit të zgjedhjeve, Blendi Çeka, LSI-ja është provë eksperimentale se çfarë ndodh kur je në pushtet, dy herë në pushtet, dhe kur nuk je fare në pushtet.

‘’LSI u kthye në peshën që ka pasur në vitin 2009, 2011. Faktori pushtet është përcaktues për suksesin e partive dhe s’ka të bëjë vetëm me të voglat, por edhe me të mëdhajat. Sa janë në pushtet zgjerohen, përformojnë më mirë, në bazë të votave që marrin shantazhojnë partitë e mëdha, por edhe këto kanë përfituar nga partitë e vogla.”, u shpreh Çeka.

Sipas tij, pushteti është një konstante që ka shoqëruar të paktën 15 vitet e fundit dinamikën dhe konkurrimin politik. Z.Çeka theksoi se LSI është shembulli që tregon domosdoshmërinë e pushtetit për të mbijetuar, tregon që partitë e vogla dhe të reja, kanë vështirësi për të mbijetuar.