Blendi Çeka: Sondazhet pas zgjedhjeve janë më realiste, sepse qytetarët janë më të relaksuar

Pedagogu i Universitetit të Tiranës, Blendi Çeka, thotë se sondazhet që bëhen pas zgjedhjeve janë më realiste për vetë faktin se qytetarët janë më të çliruar për të bërë vlerësimin e tyre.

“Dua të bëj një lloj diferencimi. Ndryshe është kur qytetarët pyeten gjatë fushatës për arsye se mënyra se si ne mendojmë është një gjendje tjetër dhe është ndryshe kur nuk ka ngjarje dhe kur ne nuk thirremi në veprim. Unë kam përshtypjen se sondazhet pas zgjedhjeve janë një lloj vlerësimi dhe janë shumë objektive”, tha Çeka.

Duke analizuar gjetjet e sondazhit paszgjedhor të Euronews Albania dhe kompanisë MRB, z.Çeka thotë se vlerësimi i mirë i situatës pas zgjedhjeve tregon faktin se qytetarët kanë pritshmëri të larta nga partia fituese.

“Ka një lloj diference se si përgjigjemi jashtë dhe pas zgjedhjeve. Janë [qytetarët] më objektivë, janë jashtë llogoreve, janë më objektivë, më realistë. Ka pritshmëri të lartë, ka një lloj pritshmërie dhe kjo është natyrë e shoqërisë, që kur mbaron një garë ta shikojnë situatën më pozitive. Ky lloj optimizmi është mesazh mirë”,  tha ai.