Blinken: Irani mund të godasë Izraelin në orët në vijim, kur mund të ndodhë sulmi

Sekretari amerikan i Shtetit, Antony Blinken, ka paralajmëruar se Irani dhe Hezbollahu mund të sulmojnë Izraelin në orët në vijim.

Raporti i Axios u publikua të hënën, teksa frika për një luftë rajonale në Lindjen e Mesme është rritur ndjeshëm.

Duke cituar tre burime të paidentifikuara, Axios raporton se Blinken u tha homologëve të G7 në një tele-konferencë, të hënën, se Irani dhe Hezbollahu mund të nisin një sulm kundër Izraelit brenda 48 orëve.

“Burimet thanë se Blinken theksoi se SHBA beson se Irani dhe Hezbollahu do të hakmerren,” shkroi Axios, duke shtuar se Uashingtoni “nuk e di kohën e saktë të sulmeve” ose çfarë forme do të ketë sulmi.

Blinken i tha homologut të tij të G7 se Shtetet e Bashkuara shpresojnë të ndalojnë përshkallëzimin duke bindur Iranin dhe Hezbollahun që të kufizojnë sulmet e tyre dhe të frenojnë çdo përgjigje izraelite. Ai u kërkoi ministrave të tjerë të jashtëm që t’i bashkohen kësaj shtytjeje duke ushtruar presion diplomatik mbi treshen.

G7, i cili përfshin gjithashtu Kanadanë, Francën, Gjermaninë, Italinë, Japoninë dhe Mbretërinë e Bashkuar, lëshoi ​​një deklaratë të hënën duke shprehur “shqetësim të thellë për nivelin e rritur të tensionit në Lindjen e Mesme” dhe bëri thirrje për përmbajtje nga të gjitha palët.

Menjëherë pas vrasjes së liderit të Hamasit Ismail Haniyeh më 31 korrik, SHBA dërgoi forca ushtarake shtesë në Lindjen e Mesme në pritje të sulmeve hakmarrëse nga Irani dhe Hezbollah.

LEXONI GJITHASHTU:

• “Po gërmoni varrin tuaj”- Shefi i Gardës Revolucionare iraniane kërcënon Izraelin
• Izraeli i rrethuar nga armiqtë, Netanyahu: Nuk jemi të pashpresë! Kush sulmon…