Bllokohen 6 mjete lundruese nga Shëngjini në Kavajë, gjobiten drejtuesit

Policia kufitare e Durrësit ka vijuar me kontrollet këtë të martë me qëllimin e vetëm parandalimin e incidenteve me pasoja për jetën dhe shëndetin e pushuesve, ku si rezultat ka bllokuar 6 mjete lundruese, 4 Jet Ski, 1 skaf dhe 1 gomone.

Drejtuesit e këtyre mjeteve lundruese u ndëshkuan me masa administrative 10 000-20 000 lekë, për mungesa në dokumentacion ose për mosregjistrim të pronësisë mbi mjetin lundrues.

Njoftimi i policisë:

Nga monitorimi i vazhdueshëm i vijës bregdetare dhe i hapësirës ujore të qarkut Durrës, me objektivin primar, garantimin e sigurisë së jetës së qytetarëve dhe pushuesve, shërbimet e Njësisë Policore Detare dhe ato të Policisë Kufitare të DVKM Durrës, kanë bllokuar në Shëngjin, Spille dhe Durrës, 6 mjete të tjera lundruese, të cilat u konstatuan në paligjshmëri të ndryshme, konkretisht:

-4 Jet Ski u bllokuan pasi u konstatuan mungesa në dokumentacion. Secili prej drejtuesve të tyre u ndëshkua me masë administrative 10 000 lekë;

-1 skaf dhe 1 gomone u bllokuan pasi drejtuesit e tyre kishin tejkaluar afatin që parashikon ligji, për regjistrimin e pronësisë mbi mjetin lundrues. Secili nga këta shtetas u ndëshkua me masë administrative 20 000 lekë.

Kontrollet dhe verifikimet vijojnë në të gjithë vijën bregdetare të qarkut.

LEXONI GJITHASHTU:

• Gjoba deri në 2000 lekë për këmbësorët, policia do mbajë “peng” ID deri në shlyerje
• Qeveritë nordike synojnë shtensionimin pas rasteve të reja të djegies së Kuranit