Bllokohet Prrenjas-Qafë Thanë, shitësit ambulantë 3-fishojnë çmimin e zinxhirëve

Si pasojë e reshjeve të dendura të dëborës në aksin Prrennjas-Qafë Thanë është krijuar një trafik kilometrik i automjeteve.

Siç shihet dhe nga pamjet e siguruara nga Euroneës Albania, reshjet intensive të dëborës që kanë përfshirë juglindjen këtë të shtunë kanë shkaktur vështirësi në qarkullimin e automjeteve.

Mësohet se Policia Rrugore ndodhet ne terren për menaxhimin e situatës.

Efektivët nuk lejojnë asnjë mjet të ngjitet në Qafë Thanë nëse nuk ka mjetin të pajisur me goma dimërore, në të kundërt nevojiten zinxhirë.

Në kushte të tilla drejtuesit e mjeteve kanë qenë të detyruar t’u drejtohen shitësve ambulantë që shesin zinxhirë në ngjitje të Qafë Thanës.

Mësohet se shitësit kanë  trefishuar çmimin e zinxhirëve që pas rritjes së kërkesës nga drejtuesit e mjeteve.

Nëse në kushte normale një palë zinxhirë gomash kushtojnë 30-40 mijë lekë të vjetra ditën e sotme drejtuesit e mjeteve që kanë dashur të mos kalojnë natën në ngjitje të Qafë Thanës, i kanë blerë ato për rreth 100 mijë lekë të vjetra.