Bora dhe shiu vështirësojnë kërkimet, viktimat mbi 4800. Shpëtohet nëna me 3 fëmijë

4800 viktima është deri më tani bilanci nga tërmeti që goditi një ditë më parë Turqinë dhe Sirinë. Shifër e cila fatkeqësisht rritet minutë pas minute.

Mes të ftohtit dëborës dhe shiut operacionet e shpëtimit kanë vijuar punën gjatë të gjithë natës. Ata po përpiqen mes shpresave të gjejnë të mbijetuar mes rrënojave.

Fatmirësisht pas 28 orëve nën rrënoja një nënë së bashku me 3 fëmijët e saj u nxorrën të gjallë nga gërmadhat.

Sipas të dhënave zyrtare 2900 persona kanë humbur jetën në  Turqi dhe 1400 të tjerë në Siri.  Sipas OBSH numri i viktimave mund të rritet në mbi 20 mijë.

Sipas disa ekspertëve toka e Anadollit ka lëvizur me 3 metra.

2600 ekspertë nga 65 shtete të botës iu janë bashkuar forcave turke në operacionet e kërkim shpëtimit. Ndihma të shumta janë duke u dërguar nga shumë vende qoftë në bazë materiale por edhe në para.

Më shumë se 300 mijë batanije dhe 41 mijë tenda u janë shpërndarë qytetarëve të cilët kanë mbetur të pastrehë.

Lëkundjet e tokës vijojnë në tokën turke dhe siriane herë pas here. Operacionet dhe ndihmat janë më të vështira për t’u dërguar në provincat siriane.

Presidenti Erdogan ka shpallur 7 ditë zie në Turqi. Presidenti Biden ka telefonuar homologun turk duke i ofruar ndihmë të pakushtëzuar në këto momente.

LEXONI GJITHASHTU: 

• E trishtë/ Foshnja lind në rrënoja, nëna vdes pasi e sjell në jetë (VIDEO)
• Turqi, nga sot 7 ditë zie pas tërmetit tragjik
• Nuk gjen qetësi Turqia, një tjetër tërmet 5.6 ballë në orët e para të mëngjesit