Braçe i përlotur mbi arkëmortin e liderit historik: Nano iu dha mundësi të gjithëve

Në Pallatin e Kongreseve kanë nisur në orën 08:30 homazhet në nder të ish-kryeministrit Fatos Nano i cili humbi jetën më 31 tetor. Arkëmorti i mbështjellë me flamurin kombëtar mbërriti pak para nisjes së homazheve.

Deputeti i Partisë Socialiste, Erion Braçe, është shfaqur i përlotur teksa është përkulur para arkëmorti me trupin e ndjerë të ish-kryeministrit ku me qindra qytetarë kanë mbajtur radhë për të nderuar figurën historike të së majtës.

“Pjesëmarrja e kaq shumë njerëzve është ajo që duhet të vijë në evidencë, është një masë shumë e madhe njerëzish që kanë luftuar me të, që u rritën në Parti Socialiste. Nano iu dha mundësi të gjithëve edhe atyre që ishin në rrënojat e Partisë së Punës dhe dolën dhe të tjerëve që iu bashkuan më vonë. Iu dha lirinë e mundshme që të bëheshin njerëz më të mirë, e bënë edhe një parti më të mirë se ajo që trashëguan”, tha Braçe në një deklaratë të shkurtër pas homazheve.

Ish-kryeministri Fatos Nano u nda nga jeta më 31 tetor në moshën 73-vjeçare. Prej më shumë se 3 javësh Nano gjendej i shtruar në një spital privat në kryeqytet në gjendje të rëndë.

Nano ndodhej në spital prej datës 8 tetor pas problemeve kronike respiratore. Ish-kryeministri, Nano pësoi arrest kardiak dhe më pas vdekje klinike të trurit. Prej ditësh gjendja e tij shëndetësore ishte e rënduar dhe pa përmirësim. Në 16 shtator të këtij viti, ish-lideri historik i PS, Nano festoi ditëlindjen e 73-të.

LEXONI GJITHASHTU:

• Kreu homazhe për ish-kryeministrin Nano, qytetarja largohet e përlotur (VIDEO)
• Rama dhe Xhoana Nano fjalim lamtumire, ceremonia e varrimit në Sharrë