Braktisja e Kuvendit, Ervin Salianji përballet me të renë në Rinvote

Kandidati i PD-së për deputet, Ervin Salianji, u pyet nga të rinjtë në lidhje me djegien e mandateve dhe sa kjo ka ndikuar në miratimin e reformës zgjedhore në mënyrë të njëanshme nga Partia Socialiste.

Ai tha se reforma fillimisht mori dakordësinë e palëve, por mazhoranca e theu këtë  marrëveshje.

“Reforma nuk është bërë  në mënyrë të njëanshme dhe pa pjesëmarrjen e opozitës, por ka qenë një proces i garantuar nga ambasadorët, kur të gjitha palët u ulën në një tryezë.  Shkelja e marrëveshjes së dakrodësuar nga ndërkombëtarët erdhi nga PS, e cila bëri një ndryshim, pa pritur rekomandimin e Venecias dhe OSBE-ODIHR për ndryshimin ose jo të sistemit zgjedhor. Konsensusi është prishur nga PS”, tha ai.

Ai tha se opozita u detyrua të linte Kuvendin, për vetë faktin se mazhoranca nuk respektonte zërin e opozitës.

“Edhe nëse do ishin në parlament do ishte e njëjta situatë pasi mazhoranca nuk pyeste për rregullat, procedurat. Arsyeja se pse ne i lamë mandatet ishte që për të treguar qytetarëve dhe ndërkombëtarëve, që s’ka demokraci funksionale dhe qe ne nuk mund të bëhemi fasadë”, tha ai.

Ergisa Bejkollari e cilësoi një vendim të gabuar largimin e opozitës nga parlamenti pasi sipas saj përballja me mazhorancën duhet të vijonte brenda institucioneve.

Teksa replikoi me z. Salianji, e reja tha se shqetësimet e qytetarëve adresohen në Kuvend dhe jo në rrugë: “Ndjeshmëritë e qytetarëve adresohen në parlament” , tha ajo.